A su inu Naran chi ses velenu, o sardu inu, puru deo ti buffo e vivo

A su inu
Naran chi ses velenu, o sardu inu,
puru deo ti buffo e vivo sanu.
So arrivadu a omine anzianu
e ando senza baculu in camminu.
Non possido unu mannu magasinu
chei cuddos chi sunu in Campidanu,
ma però tenzo semper a sa manu
unu barrile de cudd’ozastrinu.
Mi si riscaldat su samben in venas
e si coloran sas cosas in bonu
finzas in dies mannas de tristura.
Intono tando bellas cantilenas
pro gloriare custu santu donu
chi a s’omine offerit sa natura.
Montanaru
Atonzu
Atonzu torradu ses, e donzi luo
Perdet sa foza, e donzi buscu est tristu,
E frastimat su forte bentu tuo,
Chi andat mannu a treulu e a pistu.
Nues nieddas giran in sas serras,
Che umbras de gente morta, senz’assistu
E senz’amore, in sambenosas gherras.
Ma su massagiu, bettende est su ranu
In sos friscos aronzos de sas terras
E isperende in triulas lontanu,
Si preparat su pane a s’ater’annu.
Intro su magasinu iscuru e sanu
Bullit su inu in su cupone mannu
Cun impetu serenu e galiardu;
E sas messagias tessene su pannu
In sos telalzos; ruzzu pannu sardu,
Chi servit pro fagher bèrtulas e saccos
A sos pastores ch’andan’in su pardu
E in monte, cun canes e teraccos
E tazzos mannos, mudos e armados.
In sos padentes tristos, in sos baccos
De sa Tanchitta bandan’annuzzados
A leppa in chintu, solos sos procalzos,
Ch’in sos frittos meries desolados
Ferin su fogu dae sos atalzos;
Mentras chi dae s’adde iscuriosa
Bessit su fumu de sos crabonalzos
E de tristura s’amanta donzi cosa.
Montanaru
Baunei
O soave e belisimu licore
Chi rasserenas coro e mente accendes,
nettare purissimu risplendes
ed as de su belludu su colore,
e cale terra ‘eneitta su sapore
e profumu ti desit chi cumprendes?
Dae cale logu mai est chi dipendes
O nettare armoniosu che fiore?
Ah! L’isco: sa risposta mi l’est dande
Allegru e soavissimu su coro
Chi po tene in su sinu palpi tende:
Baunei tue ses, ‘inu chi adoro,
‘inu gentile ch’istas alzande
In valore sas perlas e i s’oro.
Don Zuanni Mulas ( Dorgali 1864-1945 )
S'IMBRIAGHERA
est finas bona calch'imbriaghera
de s'omine si faghet binu 'onu
ca ischertzòsu lu tenet su tonu
e faghet rier de onzi manera,
ca da su 'inu sa ment'est lizèra
cantat e ballat finas sena sonu
buffa buffa s'allegrat e s'isfogat
ballat e cantat e a murra giogat,
in armonia si mancat su 'inu
es peus de sa festa sena santu
ca non b'at ballos ne murra nen cantu
si tzilleri non b'at ne magasìnu,
ca s'omine si buffat de contìnu
olvìdat su dolòre e su piàntu
finas de sa muzere calchi 'orta
pagu s'ammentat si est bia o morta.
s'est debile su' inu cand'est cotu
che li 'ogat da conca onzi segrètu
e non tenet su minimu rispètu
ca cun d'onzi unu faghet abolòtu.
finas cun sa muzere narat totu
su notte cantu faghen'in su lettu
ca cando cotos sun certos omìnes
naran cussos e ateros machìnes.
si sa cotùra bintrat in iscèna
a boltas finit male a sos concrùos
cando faeddan a duos a duos
ponent a pare calchi dom'anzèna
su chi da sanu debil'est apena
chircat sos males anzènos e suos
no ischin dae su 'inu su chi naran
e a boltas s'istoccan'e s'isparan,
es malu cando s'omine sidìdu
li leat a su 'inu sos sabòres
però cantu sos primmos buffadòres
imbriaghende feminas'app'idu
chi buffìan piùs de su marìdu
binu cun ispumantes'e licòres
duncas mancari a cua so segùru
chi s'imbriagan sas feminas puru.
Pietro Zedda
ZIU PASCALE
Ziu Pascale, morinne in su lettu
non bi l’achiat prusu,non bi l’achiat prusu
ma l’er bastatu unu litru ‘e vernaccia
como est arzillu, evviva a sa vaccia!
Lu viet franziscu
Maria e Pascale
su vinu vonu non fachet mai male
mesca s’ervitu in cumpanzia
salute bos siat, salute, salute!
Poi b’est Maria amante distratta
un’amore novu l’hat conquistata
una cuppa ‘e vinu s’abrazzat e basat
sin che la viet dae s’oje a s’incrasa
Lu viet.....
Amore bellu, caru tesoro
intro ‘e die ti juco in su coro
ma canno toccat s’Ave Mafria
geo ti pianto pro sa malvasia
Lu viet.....
Cheriat mortu a balla sola
su c’hat imbentatu sa Coca-Cola
Ma pro sos fomines chi juchen cherveddu
bi cheret fiascos de vinunieddu
Lu viet....
Su vinu er bellu, est generosu
achet allegru chie est umbrosu
viit e tottu, buffate meta
ma attenzione a sa brachetta!
Lu viet....
Cantzone de Chelleddu Burrai.
http://www.youtube.com/watch?v=DYJV9JGMI6Q
Non buffo pius binu
Ca mi l’hat proibidu su dottore
non buffo pius binu.
E ite pena pro cust’istadu meu, ite dolore!
Tristu est su pranzu e peus est sa chena
ca tue, rugiu licore delicadu,
non lughes in sa taula serena.
Ai custu non fia abituadu.
Mancari esset miseru su pastu,
cun tue, binu ardente e profumadu,
Curaia s’istogomo guastu.
E senza purgas e senza meighina
digeria pro finz’ei su crastu.
Cantu fit bellu s’istare in cantina
in sos seros d’istiu! E in atonzu
su inu nou buffende in coghina
Da’ unu ezzu e pinturadu conzu,
mentras chi bellas femminas in giru
sighian risulanas su filonzu.
Oras caras de sabiu deliru,
benide tottas che innamoradas
a mi dare d’amore unu suspiru.
Ue sezis, o bellas cambaradas
d’amigos fortes? Lestros accurride
ca faeddamos de sas barraccadas
Fattas cun tue, sambene ’e sa ide.
Fimis tando sos meres de su mundu
cun sos coros pienos d’alta fide
Chi nos poniat fogu dae fundu.
Oh boghes de tenore a notte tarda!
Oh ballos cuminzados tott’in tundu
Cun tue, poderosa zente sarda!
Amigos d’Oliena e de Durgale,
o razza nuoresa galiarda,
Pius no hap’a benner gioviale
a tastare in sos tuos magasinos
su inu veramente ispeciale.
Como d’erbas mi nutro e de brodinos,
caffè cun latte che una partera
e buffo s’abba frisca in sos trainos.
Però si passat custa violera,
pro te, binu nieddu, hap’a gherrare
che fante pro sa propria bandera.
Ti devo dae nou laudare
in festinos tra bezzos pili canos
e giovaneddas prontas a ballare
Cun giovanos fieros e galanos.
Montanaru