Quela strada che portava da Vinas piena de ricordi dela mia infanzia

22
LA VOCE DEL POPOLO
Esuli rimasti|
Sabato, 22 agosto 2009
di Alfredo Fucci
CIACOLADE|
Quela strada che portava da Vinas
piena de ricordi dela mia infanzia
A cura di
Roberto Palisca
Ognidun de noi nel esodo, ga nei ricordi
un angolo dela sua città che nol pol dimenticar e che nele noti insonni ghe torna inamente quando, sopratuto, se se xe avanti coi ani,
de note se dorme poco (a chi non ghe capita). Mi ero putel a Cosala e el mio mondo in
quei ani se misurava cussi: dala scola Manzoni fino al pek Pucikar e po zò, fin al Tempio
Votivo.Tuto el mio mondo era là. Cossa che
non go visto in quel toco de strada: tuta la storia del’ultima guera, e tuto in quei pochi pasi,
in su e in zò. La casa del pistor prima e dopo
la famosa bomba che lo gaveva mazà; el caligher, in quel picolo sgabuzin che era di fronte, un buzo vero e proprio, e se dovesa andar
su per un scalin per parlar con lui. La vista de
Tersatto e, soto la strada, el teto de la casa del
maestro, del qual non me ricordo più el suo
nome. Là se fermava la coriera e mi andavo a
cior dal autista la scatola de scarpe con drento
i scombri che el nono comprava in pescaria, e
cussi el mandava i pesi a casa.
Là, ve dixevo, era la paneteria Pucikar e
mi speso andavo a comprar le struze de pan
insieme a una belissima putelina, la Cicci,
quando che la sua nona la la mandava anca
a ela a cior el pan. E per mi andar con ela era
un avenimento ecezional: una festa.
Là purtropo go visto anca, ingrumadi e inquadradi, soldati italiani sbandadi l’8 de setembre che i tedeschi gaveva bloccà e po col
camion portà chissa dove. Là go visto la prima volta i tedeschi con sul brazo le stelle alpine: duri impaladi, ai ordini de un uffizial
teribile. Sui muri de quela strada go visto la
prima volta anca le scrite rosse “Zivio Tito”
che spuntava de matina, come fa i fiori che de
sera i se ciude e col sol i se riapre, e pensavo
a chi de note gaveva gavù el coragio de scriver in scuro sui muri sta roba, su una strada
indove che i tedeschi pasava in machina coi
fari impizadi a tute le ore.
Oltre la curva mi, come che se fazeva de
muli. andavo in zò per el prato ripido e una
volta che fazevo cussì go trovado vicin a una
graja vestiti e documenti de una dona. Tirava
un leger vento che veniva de Tersatto. Non
ghe era nessun in giro. Go pensà che qualchedun fossi la vizin, magari morto e son scampà. Ma prima go ingrumà le carte e guardà la
fotografia de sta dona che era sui documenti.
E fin che mi guardavo ste carte, una patuglia
de tedeschi me ga visto e i me xe vegnù là. Mi
go zerca de spiegarme, che non savevo niente, che quela roba era là de per tera. Go ciapà
paura che non ve conto. De sera go visto arivar tante machine e i tedeschi armadi vegnir
zo de ste auto a controlar el prato. Me ricordo
dele zigade dala mia mama che non le finiva
mai. “Non se ingruma niente de per tera” – la
me gaveva deto. “Ti pol ciapar malatie. E po’
la gente pol pensar chissa cossa se i te vede
far ste robe. Non se fa, ti ga capido?”
Su ‘sta strada de Cosala gavevo visto con
spavento una volta anca i mongoli, quei de la
Russia, ma vestidi de tedeschi. I gaveva grossi mustaci e delle facce ‘sai poco rassicuranti. I era a bordo de zerte grandi carete zucade
da cavai giganteschi. Su quela strada go visto
po’ anca arivar zo “quei del bosco”, coi s’ciopi, con le opanche, coi cari carighi de roba e
con bestie. In quel toco de strada xe passa insoma bona parte dela mia storia.
Ma era anca una strada alegra, prima de
sti fati. Per ‘sta strada vegniva in zo de Vinas
cantando, de domenica sera, tute le clape de
giovani. Vinas, per chi che non xe fiuman, era
una ostaria a metà strada tra Cosala e Drenova, che era ‘sai frequentada a quei tempi. E la
mularia che andava là ogni domenica tornava
de sera tuta alegra. Era un spetacolo che mi
non volevo mai perderme e me ricordo che
de domenica stavo sul porton de casa a cucar, finchè la mama, rabiada, me zigava de
vegnir via che era ora de zena. Ma mi son
sicuro ancora adeso che non era per questo
che la me ciamava, ma perché la gaveva paura che non me imparassi così a dir anche brute robe e parolazze in croato. Ma mi per fortuna non capivo.
Su ‘sta strada, in tempo de guera, era rimasti anca blocadi una autoblindo, restada
senza le rode, e un vecio camion militar che
stava fermo su la salita de Capitanovo, e indove che mi qualche volta andavo a sbisigar
e a far finta de guidar. Co ghe penso, ogi, credo che ris’ciavo forte sul serio. Se molavo el
fren a man el camion saria andà in zo per la
discesa con mi dentro e chissa cossa che saria
potudo nasser.
Una matina, che era ancora scuro, gavevo
sentì rumori de camion e son corso fin al porton per veder cossa che era sto tramac. Cussi go visto che certi tipi, con una picia grua,
de sta autoblindo i cavava via el motor. Non
era militari quei, ma gente in borghese, che
fazeva tuto de fretta, senza fiatar e senza dir
una parola.
Così ghe era rimasto solo el scheletro de
sta autoblindo e mi dopo, dentro, me go podù
giogar ancora. De ‘sta strada insoma, go molti ricordi dela mia infanzia. Solo quando che
son diventà più grando, con la scusa de andar
dai noni in botega in zitavecia, go scominzià
a andar anche in altri posti. Me ricordo cussì
che andavo curiosar in porto. E quela era per
mi una granda aventura. Sia per le navi e per
i rumori che per la zente che era in giro. Ma
dopo me presentavo dai noni in botega e tornavo con lori con la coriera ala mia Cosala.
Un viagio che me pareva ‘sai lungo, perché
per calarse in cità, oltre la Donatello, andando
in zò per le scalete, fazevo in un atimo, saltando i scalini a due a due fino al Palazo del
Governo e poì de là, pasando per la zitavecia,
arivavo subito nel cuor dela cità. Soto la Tore
era una cartoleria e là mi me fazevo far el timbro col mio nome che dopo stampavo dapetuto. Che meraviglia che era esser muli a Fiu-
me. Era tuta una aventura. Per questo quando
che son partì que bruto ano, col treno e con
la mia mama, ero ‘sai preocupado e ghe domandavo sempre: “Ma quando tornemo?”
Ogi so che non sariimo più tornadi e la
mia Fiume la vedo solo in sogno. Zerto, xe
vero, ghe son tornà de vecio, dopo tanti ani.
Ma anche se i loghi era i stessi, qualcossa era
diverso. La gente forse. Ma de più el fato che
mi non ero più mulo.
Questo xe el problema. E cussi, co non
posso indormenzarme e speto che me vegni
sono, zerco de sognar de esser ancora putel
e de giogarme con la mia amica Lavinia, a
far rodolar un vasetto svodo de crema “Nivea” pien de acqua che rodolando la spriza in
giro. In te la fantasia de noi muleti, era come
el camion che bagnava le strade quando che
el veniva in suzo fino el Pucikar, perchè era
là che ai mii tempi finiva la strada asfaltada.
E de quel giogheto che fazevo con la Lavinia
me ricordo anca ogni volta che in una drogheria o in una profumeria vedo sti vasetti de
crema “Nivea” che ogi i vende anca in confezion dopia. E un giorno che mi me xe tornà
inamente sti ricordi son andà là per comprar
uno. E la comesa me ga domanda “Vuole il
vasetto piccolo o quello doppio?”. Indiferente, go pensà tra mi e mi. Ghe ne go comprà
uno, così per viz, ma adesso non so proprio
cossa far con lui. Peccà.
Alfredo Fucci